لعبة This War Of Mine بتقدملك المنظور ده عن إنك عبارة عن مجموعة من الناجيين إللي بيحاولوا يحاربوا الجوع و المرض داخل بيت مهدم و عليك إنك تحافظ علي الموقف و توفر لهم الحاجات دي ..
اللعبة درامية , واقعية جداً , بتقدم قصة عن حرب بتحصل حتي لحظتنا دي لألاف من البشر .. الجرافيك فاللعبة مش متطور بالدرجة الكفاية هو عبارة عن 3 الوان ابيض و اسود و رمادي كـ ألوان اساسية بعيداً عن بعض الأدوات الإضافية التانية , البيئة عميقة جداً و بتعطيك إحساس الحرب فعلاً و إن كل يوم بيعدي جوا اللعبة بيكون بمثابة إنحدار للأسفل سواء كان بسبب قلة الأدوات و المواد اللازمة للمعيشة او بسبب احوال الجو فاللعبة اللي بتسوء و بتدفع الأشخاص الناجيين للمرض و ده اللي يخليك تبذل مجهود اكبر للبحث عن الأدوية .. الاماكن فالـ Box او فالشنطة اللي معاك محدودة و ده اللي بيخليك تضحي بـ الأكل , الدواء أو الأدوات اللي إنت هتحتاجها في حاجات هتعرفها بعد كده .... الأجواء و الشخصيات بتتغير بشكل عشوائي , ده غير إنك لازم توفر للشخصيات اللي بتلعب بيها كل سُبُل الراحة بما فيهم الراحة النفسية , لأنك لازم تمنع اي شخصية من الإنتحار بسبب العبئ النفسي من الحرب أو الحاجات اللي بيعملها رغماً عنه فإنه يسرق أو يقتل علشان يعيش ..
اللعبة منقسمة لـ جزئين النهار و الليل .. النهار بتحاول تبني البيت و توفر فيه الادوات اللازمة كـ "سراير للجرحي" او إنك تبني "فرن مثلاً" و تحاول توفر للأشخاص أكبر قدر من الراحة , و بالليل بتبتدي تهجم علي البيوت الثانية بغرض إنك تسرق منها بعض الأكل أو الأسلحة اللي المفروض تدافع بيها عن نفسك او تستخدمها فالهجوم علي بيت تاني..
كل شخصية فاللعبة ليها قصتها الخاصة و تقدر تعرفها عن طريق كتابة مذكراته و اللي بتكون علي حسب مجري اللعبة سواء فالإنحدار او الإرتقاء.
ملخص الموضوع , اللعبة عميقة جداً و المطور بيديك نظرة لـ حياة الناس اللي بتعيش فالحرب الأهلية او في الدول النامية الفقيرة , الـ Mechanics و الـ Gameplay فاللعبة عبارة عن إنك بتستخدم الـ Mouse كـ اداة للتحريك + اللعبة بسيطة و ممكن تشتغل علي اي جهاز ضعيف, الأصوات فوق الممتازة و الـ Sound Tracks درامية و كئيبة جداً لكن هتُعجب بيها , اللعبة ممتازة لازم كلكم تجربوها
انا نزلت اللعبه وهجربها
ردحذفوشكرا على المراجعه الجميله